Forsíða  |  Jökulfirðir  |  Saga byggðar  |  Saga Kollsár |   Saga ættar  |  Uppbygging  |  Ferðalög  |  Um vefinn

Saga ættar hefst í Noregi eins og við er að búast. Fyrstur kemur við sögu Björn „buna“ Grímsson og Vélaug kona hans, fædd 770. Ekki fer frekari sögum af Vélaugu en vitað er að Björn buna var hersir í Noregi. Sonur þeirra var Ketill flatnefur Bjarnarson, fæddur 810, „einn ágætur hersir í Noregi“ að því er segir í Eyrbyggja sögu. Meðal barna hans má nefna Auði djúpúðgu. En ætt Kollsármanna er komin af annarri dóttur Ketils, Þórunni hyrnu, fæddri 848, og Helga magra Eyvindarsyni sem nam land í Eyjafirði. En þræðirnir liggja eflaust víðar.

Þessi þáttur ættarsögunnar verður ekki rakinn nánar hér. Þótt gaman geti verið að rekja ættir langt aftur í aldir verður fyrst og fremst staldrað við fólkið sem höfundur hafði persónuleg kynni af. Þar koma við sögu tveir afar, tvær ömmur og svo langamma og eiginmaður hennar. 

Einar afi kemur næst við sögu á Dynjanda í Leirufirði. Í alllangri frásögn föður míns af uppvexti sínum segir: „Ég sá ekkert afa mína eða ömmur, munu sennilega hafa dáið sem tiltölulega ungt fólk, en minnist aftur á móti þess hlýleika og ljúfmennsku sem ég naut hjá fósturforeldrum foreldra minna, Rósu og Benedikts á Dynjanda.“ Þar fæddist faðir höfundar  hinn 3. september árið 1915.

Ólöf amma Jóhannesdóttir fæddist 21. júlí 1887, dóttir Jóhannesar Ólafssonar og Jóhönnu Gideonsdóttur, hjóna í Kjös. Ólöf mun hafa alist upp hjá Benedikt Kr. Benediktssyni og Gunnvöru Rósu Elíasdóttur á Dynjanda.

Einar afi og Ólöf amma.
Myndin er lílklega tekin um miðjan
sjöunda áratuginn, kannski
inni í Skógi.

Einar og Ólöf fluttust að Kollsá úr húsmennsku frá Dynjanda á fardögum 1920.  Þau keyptu Kollsárjörðina á 2000 krónur og hýstu hana um 1930 en gömul hús voru þá fallin. Þau byggðu hlöðu úr timbri með járnþaki, tvö samstæði fjárhús úr sama efni að mestu og lítið hesthús með steyptu gólfi og járnþaki en veggir voru hlaðnir. Einnig byggðu þau íbúðarhús úr timbri. Höfundur hefur fundið þar margar fjalirnar merktar „Einar Guðleifsson Kollsá“. Húsið var með járnþaki og steypt var utan um. Það var svo stækkað um helming og var sá hluti steyptur og er með hnausþykkum veggjum. Efri hæðin var þiljuð í tvennt en á neðri hæð var stofa, herbergi afa og ömmu, búr og geymsla. Í áföstum skúr var geymdur mór.

Viðkoma virðist hafa verið töluverð í báðum ættum fólksins á Kollsá. Snorri Einarsson, langalangafi Einars afa, mun hafa verið þríkvæntur, og síðasta konan var reyndar dóttir þáverandi bónda á Kollsá. Snorri er sagður hafa átt um 20 börn á jafnmörgum árum og var reynar nefndur Barna-Snorri. En það var ekki ósvipað í hinn ættlegginn. Móðurafi höfundar, Jónas Guðjónsson, var nefndur Barna-Jónas þótt börnin hafi bara verið átta á tíu árum.

Einar afi dó 4. febrúar 1967 en Ólöf amma
29. nóvember sama ár. Þau höfðu búið hjá Veigu dóttur sinni í Bolungarvík frá því að þau
fluttust frá Kollsá.

© 2008 Svanberg K. Jakobsson. svanberg (hjá) kollsa.net. Síðast breytt 10. janúar 2009